اسلام آباد۔24اگست (اے پی پی) پاک فضائیہ قدرتی آفات دے دوران انسانی امداد پڄاوݨ اچ ہمیشہ اڳوں رہی اے ، آپݨی ایں روایت کوں برقرار رکھیندے ہوئیں اجوکے سیلاب ویلھے پی اے ایف متاثرین کوں ریلیف اتے ریسکیو امداد ݙیوݨ تے کم کریندی پئی اے ۔ موجودہ امدادی آپریشن پاکستان ائیر فورس دے ایں عزم دا عملی مظہر اے جو اوکھے ویلھے اساں ہم وطناں دی مدد کیتی ویسی ۔ ترجمان پاک فضائیہ موجب پاک فضائیہ اڄوکے ودھ سارے مینھ وسݨ تے چھل توں متاثرہ بلوچستان، سندھ اتے جنوبی پنجاب دے علاقیں اچ امدادی کارروائیاں اچ ودھ چڑھ تے حصہ گھندی پئی اے ۔پاک فضائیہ مختلف فیلڈ میڈیکل کیمپس وی قائم کیتن جتھاں پی اے ایف دے ڈاکٹرز اتے پیرامیڈیکل اسٹاف سیلاب متاثرین کوں چووی گھنٹے مفت علاج دیاں سہولتاں تے دوائیں ݙیندے پئن ، ریلیف آپریشن دے دوران پی اے ایف دی ایمرجنسی ریسپانس ٹیماں تیار کھاݨا، راشن تے ٻیاں ضروری چیزاں ونڈیاں ۔ گزریل 24 گھنٹے انسانی ہمدردی دی بنیاد تے 1174 راشن پیک، 13200 پاؤنڈ بنیادی کھاوݨ پیوݨ دیاں چیزاں ضرورت مند خانداناں اچ ݙتیاں ڳئن ، پاک فضائیہ دیاں میڈیکل ٹیماں 695 مریضاں کوں طبی امداد وی ݙتی۔
