اسلام آباد۔18اگست (اے پی پی):سینیٹ اچ قائد ایوان و وفاقی وزیر قانون و انصاف سینیٹر اعظم نذیر تارڑ آکھیے جو شہباز گل ملکی سرحداں دی حفاظت کرݨ آلے اداریں تے زبان درازی کیتی تے اداریں تے چڑھائی کیتی، جیڑھا بندہ تریمتاں دے خلاف ڳالھیں کرے تے لوکاں دیاں پڳاں چاوے تاں ایندے خلاف قانون آپݨا رستہ گھنسی ، جے کوئی تفتیش توں فرار چاہندے تاں ایویں نی تھی سڳدا ، پی ٹی آئی آلیں کوں ایں ویلھے شرم کیوں نہ آئی جݙاں انہاں رانا ثناءاللہ تے 15کلو ہیروئن پاتی ہئی ، خمیس کوں سینیٹ اجلاس اچ قائد حزب اختلاف سینیٹر ڈاکٹر شہزاد وسیم دے نکتہ اعتراض دے جواب اچ انہاں آکھیے جو پی ٹی آئی دے ارکان ڳالھ کریندن تاں آپݨے اندر سݨݨ دا حوصلہ وی پیدا کرن ، تشدد کیویں تھیندا رہیا (ن) لیگ اتے پیپلزپارٹی دے رہنماواں تے کارکناں توں پچھو، رانا ثناءاللہ تے 15 کلو ہیروئن پاتی ، انہاں دے منہ کالے کیوں نہ تھئے تے انہاں کوں شرم کیوں نہ آئی، ادھی ادھی رات کوں ساݙے کارکناں دے گھر چھاپے ماریے ویندے پن ، ہݨ شہباز گل دے ساہ اوکھے تھیندے پئن، اوں ریاستی اداریں تے چڑھائی کیتی، جے کوئی ڳالھ ہے تاں ایں تے قائم وی رہو، پی ٹی آئی آلیں جیلاں تے صعوبتاں نی ݙٹھیاں ، پورے ملک شہباز گل دی ڳالھ سݨی اے اوں بغاوت تےاکسائے ، کیا ایں بندے کوں پھلاں دے ہار پوائے ونڄن جیں ملکی سرحداں دی حفاظت کرݨ آلیں تے زبان درازی کیتی اے ۔
